ਅਰਜਨਟੀਨਾ ਦੀ ਉਪ ਰਾਸ਼ਟਰਪਤੀ ਅਤੇ ਖੱਬੇਪੱਖੀ ਨੇਤਾ ਕ੍ਰਿਸਟੀਨਾ ਫਰਨਾਂਡੇਜ਼ ਡੀ ਕਿਰਚਨਰ ਨੂੰ ਭ੍ਰਿਸ਼ਟਾਚਾਰ ਦੇ ਇੱਕ ਮਾਮਲੇ ਵਿੱਚ ਛੇ ਸਾਲ ਦੀ ਕੈਦ ਅਤੇ ਜਨਤਕ ਅਹੁਦੇ ਤੋਂ ਉਮਰ ਭਰ ਦੀ ਪਾਬੰਦੀ ਦੀ ਸਜ਼ਾ ਸੁਣਾਈ ਗਈ ਹੈ। ਅਰਜਨਟੀਨਾ ਦੀ ਇੱਕ ਸੰਘੀ ਅਦਾਲਤ ਨੇ ਉਨ੍ਹਾਂ ਨੂੰ ਇੱਕ ਉੱਚ-ਪ੍ਰੋਫਾਈਲ ਭ੍ਰਿਸ਼ਟਾਚਾਰ ਦੇ ਕੇਸ ਵਿੱਚ ਦੋਸ਼ੀ ਪਾਇਆ ਹੈ। ਉਹ ਸਜ਼ਾ ਨੂੰ ਸੁਪਰੀਮ ਕੋਰਟ ਵਿੱਚ ਚੁਣੌਤੀ ਦੇ ਸਕਦੇ ਹਨ। ਕਿਰਚਨਰ ‘ਤੇ 2007 ਅਤੇ 2015 ਦੇ ਵਿਚਕਾਰ ਰਾਸ਼ਟਰਪਤੀ ਦੇ ਤੌਰ ‘ਤੇ ਆਪਣੇ ਦੋ ਕਾਰਜਕਾਲ ਦੌਰਾਨ ਪ੍ਰਸ਼ਾਸਨ ਦੁਆਰਾ ਜਨਤਕ ਕੰਮਾਂ ਦੇ ਠੇਕੇ ਦੇਣ ਵਿੱਚ ਬੇਨਿਯਮੀਆਂ ਦਾ ਦੋਸ਼ ਲਗਾਇਆ ਗਿਆ ਸੀ। ਕਿਰਚਨਰ ‘ਤੇ ਅਪਰਾਧਿਕ ਸੰਗਠਨ ਚਲਾਉਣ ਦਾ ਵੀ ਦੋਸ਼ ਸੀ, ਜਿਸ ਨੂੰ ਤਿੰਨ ਜੱਜਾਂ ਦੇ ਪੈਨਲ ਨੇ ਖਾਰਜ ਕਰ ਦਿੱਤਾ ਸੀ।
ਅਲਜਜ਼ੀਰਾ ਦੀ ਰਿਪੋਰਟ ਮੁਤਾਬਿਕ ਇਸ ਸਾਲ ਅਗਸਤ ‘ਚ ਇਸਤਗਾਸਾ ਪੱਖ ਨੇ ਅਦਾਲਤ ਨੂੰ ਅਪੀਲ ਕੀਤੀ ਸੀ ਕਿ ਉਪ ਰਾਸ਼ਟਰਪਤੀ ਨੂੰ 12 ਸਾਲ ਦੀ ਕੈਦ ਅਤੇ ਉਸ ਦੀ ਰਾਜਨੀਤੀ ‘ਤੇ ਉਮਰ ਭਰ ਪਾਬੰਦੀ ਲਗਾਈ ਜਾਵੇ। ਕਿਰਚਨਰ ਨੇ ਆਪਣੀ ਸਜ਼ਾ ਨੂੰ ਗਲਤ ਅਤੇ ਪੂਰਵ-ਵਿਚਾਰਿਤ ਕਰਾਰ ਦਿੱਤਾ ਹੈ। ਫੈਸਲੇ ਤੋਂ ਬਾਅਦ ਕਿਰਚਨਰ ਨੇ ਕਿਹਾ ਕਿ ਉਹ ਸਮਾਂਤਰ ਸਰਕਾਰ ਅਤੇ ਨਿਆਂਇਕ ਮਾਫੀਆ ਦਾ ਸ਼ਿਕਾਰ ਹੋ ਗਈ ਹੈ। ਵਕੀਲਾਂ ਨੇ ਦੋਸ਼ ਲਾਇਆ ਕਿ ਜਨਤਕ ਕੰਮਾਂ ਦਾ ਠੇਕਾ ਫਰਨਾਂਡੇਜ਼ ਡੀ ਕਿਰਚਨਰ ਦੇ ਇੱਕ ਵਪਾਰੀ ਸਹਿਯੋਗੀ ਨੂੰ ਦਿੱਤਾ ਗਿਆ ਸੀ, ਜਿਸ ਨੇ ਬਾਅਦ ਵਿੱਚ ਉਨ੍ਹਾਂ ਨੂੰ ਅਤੇ ਉਨ੍ਹਾਂ ਦੇ ਮਰਹੂਮ ਪਤੀ ਨੇਸਟਰ ਕਿਰਚਨਰ ਨੂੰ ਪੈਸੇ ਵਾਪਿਸ ਕਰ ਦਿੱਤੇ ਸਨ। ਨੇਸਟਰ ਕਿਰਚਨਰ 2003 ਤੋਂ 2007 ਤੱਕ ਅਰਜਨਟੀਨਾ ਦੇ ਰਾਸ਼ਟਰਪਤੀ ਵੀ ਰਹੇ ਸਨ।
ਮੁੱਖ ਵਕੀਲ ਨੇ ਠੇਕਿਆਂ ਦੀ ਵੰਡ ਦੀ ਕਥਿਤ ਯੋਜਨਾ ਨੂੰ ਦੇਸ਼ ਦੀ ਸਭ ਤੋਂ ਵੱਡੀ ਭ੍ਰਿਸ਼ਟਾਚਾਰ ਮੁਹਿੰਮ ਕਰਾਰ ਦਿੱਤਾ ਸੀ। ਕਿਰਚਨਰ ਦੇ ਸਮਰਥਕਾਂ ਨੇ ਕਿਹਾ ਹੈ ਕਿ ਇਹ ਕੇਸ ਸਿਆਸੀ ਅਤੇ ਨਿਆਂਇਕ ਜ਼ੁਲਮ ਦੀ ਮਿਸਾਲ ਹੈ। ਕਿਰਚਨਰ ਨੇ ਦੋਸ਼ ਲਾਇਆ ਕਿ ਅਦਾਲਤ ਉਸ ਲਈ ਫਾਇਰਿੰਗ ਸਕੁਐਡ ਵਾਂਗ ਹੈ ਅਤੇ ਸਰਕਾਰੀ ਵਕੀਲ ਉਸ (ਕਿਰਚਨਰ) ਦਾ ਅਪਮਾਨ ਕਰਨ ‘ਤੇ ਤੁਲੇ ਹੋਏ ਹਨ।