ਕੰਪਿਊਟਰ ‘ਤੇ ਕੰਮ ਕਰਨ ਨਾਲ ਗਰਦਨ ‘ਚ ਆਏ ਅਕੜਾਅ ਦੀ ਸਮੱਸਿਆ ਤੋਂ ਰਾਹਤ ਪਾਉਣ ਲਈ ਅਪਣਾਓ ਇਹ ਟਿਪਸ

ਅਜੌਕੇ ਸਮੇਂ ਵਿੱਚ ਜ਼ਿਆਦਾਤਰ ਲੋਕਾਂ ਦਾ ਕੰਮ ਕੰਪਿਊਟਰ ਅਤੇ ਲੈਪਟਾਪ ‘ਤੇ ਹੀ ਹੁੰਦਾ ਹੈ। ਉੱਪਰੋਂ ਘਰ ਤੋਂ ਕੰਮ ਕਰਨ ਦੇ ਮਾਮਲੇ ‘ਚ ਲੋਕ ਕਿਸੇ ਵੀ ਥਾਂ ‘ਤੇ ਬੈਠ ਕੇ ਲੈਪਟਾਪ ਤੋਂ ਕੰਮ ਕਰਨਾ ਸ਼ੁਰੂ ਕਰ ਦਿੰਦੇ ਹਨ। ਪਰ ਇਸ ਨਾਲ ਬੈਠਣ ਦਾ ਪੋਸਚਰ ਗਲਤ ਹੋ ਜਾਂਦਾ ਹੈ। ਇਸ ਕਾਰਨ ਗਰਦਨ ‘ਚ ਅਕੜਾਅ ਦੀ ਸਮੱਸਿਆ ਲੋਕਾਂ ‘ਚ ਆਮ ਦੇਖਣ ਨੂੰ ਮਿਲ ਰਹੀ ਹੈ। ਅੱਜ ਹਰ ਦੂਜਾ ਵਿਅਕਤੀ ਗਰਦਨ ਦੇ ਦਰਦ, ਅਕੜਾਅ ਦੀ ਸਮੱਸਿਆ ਤੋਂ ਪ੍ਰੇਸ਼ਾਨ ਹੈ। ਅਜਿਹੇ ‘ਚ ਜੇਕਰ ਤੁਸੀਂ ਵੀ ਇਸ ਸਮੱਸਿਆ ਤੋਂ ਗੁਜ਼ਰ ਰਹੇ ਹੋ ਤਾਂ ਕੁੱਝ ਕਾਰਗਰ ਉਪਾਅ ਅਪਣਾ ਕੇ ਤੁਸੀਂ ਇਸ ਤੋਂ ਛੁਟਕਾਰਾ ਪਾ ਸਕਦੇ ਹੋ। ਆਓ ਜਾਣਦੇ ਹਾਂ ਇਸ ਬਾਰੇ…

ਗਰਦਨ ਦੀ ਐਕਸਰਸਾਈਜ਼ ਕਰੋ
ਜੇਕਰ ਤੁਸੀਂ ਲੰਬੇ ਸਮੇਂ ਤੱਕ ਲੈਪਟਾਪ, ਕੰਪਿਊਟਰ ਦੇ ਸਾਹਮਣੇ ਬੈਠ ਕੇ ਕੰਮ ਕਰਦੇ ਹੋ ਤਾਂ ਇਸ ਨਾਲ ਤੁਹਾਡੀ ਗਰਦਨ ‘ਚ ਅਕੜਾਅ ਅਤੇ ਦਰਦ ਹੋ ਸਕਦਾ ਹੈ। ਇਸ ਤੋਂ ਬਚਣ ਅਤੇ ਰਾਹਤ ਪਾਉਣ ਲਈ ਤੁਸੀਂ ਕੁਰਸੀ ‘ਤੇ ਬੈਠ ਕੇ ਕਸਰਤ ਕਰ ਸਕਦੇ ਹੋ। ਇਸ ਦੇ ਲਈ ਸਭ ਤੋਂ ਪਹਿਲਾਂ ਕੁਰਸੀ ‘ਤੇ ਬਹੁਤ ਹੀ ਸਿੱਧੇ ਅਤੇ ਆਰਾਮਦਾਇਕ ਆਸਣ ‘ਚ ਬੈਠੋ। ਇਸ ਤੋਂ ਬਾਅਦ ਗਰਦਨ ਨੂੰ ਹੇਠਾਂ ਵੱਲ ਮੋੜ ਕੇ ਠੋਡੀ ਨੂੰ ਛਾਤੀ ‘ਤੇ ਰੱਖੋ। ਕੁੱਝ ਸਕਿੰਟਾਂ ਲਈ ਇਸ ਅਵਸਥਾ ‘ਚ ਰਹੋ। ਇਸ ਤੋਂ ਬਾਅਦ ਹੌਲੀ-ਹੌਲੀ ਗਰਦਨ ਨੂੰ ਪਿੱਛੇ ਵੱਲ ਮੋੜੋ। ਇਸ ਪ੍ਰਕਿਰਿਆ ਨੂੰ 5-7 ਵਾਰ ਦੁਹਰਾਓ। ਇਸ ਕਸਰਤ ਨੂੰ ਹਰ 2-3 ਘੰਟੇ ਬਾਅਦ ਕਰਨ ਨਾਲ ਤੁਹਾਨੂੰ ਕੁੱਝ ਰਾਹਤ ਮਹਿਸੂਸ ਹੋਵੇਗੀ।

ਦੋਵੇਂ ਪਾਸੇ ਗਰਦਨ ਘੁਮਾਓ
ਇਸ ਦੇ ਲਈ ਸਭ ਤੋਂ ਪਹਿਲਾਂ ਗਰਦਨ ਨੂੰ ਸਿੱਧੀ ਕਰ ਲਓ। ਫਿਰ ਹੌਲੀ-ਹੌਲੀ ਕੁੱਝ ਮਿੰਟਾਂ ਲਈ ਗਰਦਨ ਨੂੰ ਸੱਜੇ ਅਤੇ ਖੱਬੇ ਹਿਲਾਓ। ਇਸ ਤੋਂ ਬਾਅਦ ਖੱਬੇ ਤੋਂ ਸੱਜੇ ਘੁੰਮਾਓ। ਇਸ ਨੂੰ ਤੁਸੀਂ ਕੁਰਸੀ ‘ਤੇ ਬੈਠ ਕੇ ਵੀ ਆਸਾਨੀ ਨਾਲ ਕਰ ਸਕਦੇ ਹੋ। ਇਸ ਪ੍ਰਕਿਰਿਆ ਨੂੰ ਹਰ 2-3 ਘੰਟਿਆਂ ‘ਚ 10-10 ਵਾਰ ਦੁਹਰਾਓ। ਇਸ ਨਾਲ ਤੁਹਾਨੂੰ ਗਰਦਨ ਦੇ ਦਰਦ, ਅਕੜਾਅ ਆਦਿ ਤੋਂ ਰਾਹਤ ਮਿਲੇਗੀ। ਗਰਦਨ ਦੇ ਦਰਦ ਅਤੇ ਅਕੜਾਅ ਨੂੰ ਦੂਰ ਕਰਨ ਲਈ ਇਹ ਆਮ ਉਪਾਅ ਹਨ। ਪਰ ਜੇਕਰ ਤੁਹਾਨੂੰ ਇਨ੍ਹਾਂ ਤੋਂ ਰਾਹਤ ਨਹੀਂ ਮਿਲਦੀ ਹੈ ਜਾਂ ਸਮੱਸਿਆ ਜ਼ਿਆਦਾ ਹੈ ਤਾਂ ਬਿਨਾਂ ਦੇਰੀ ਕੀਤੇ ਤੁਰੰਤ ਡਾਕਟਰ ਦੀ ਸਲਾਹ ਲਓ।