ਪੇਟੀਐਮ ਲਈ ਇੱਕ ਬੁਰੀ ਖ਼ਬਰ ਆਈ ਹੈ। RBI ਨੇ Paytm ਪੇਮੈਂਟਸ ਬੈਂਕ ‘ਤੇ ਕਈ ਪਾਬੰਦੀਆਂ ਲਗਾਈਆਂ ਹਨ। 31 ਜਨਵਰੀ ਨੂੰ, ਭਾਰਤੀ ਰਿਜ਼ਰਵ ਬੈਂਕ (ਆਰਬੀਆਈ) ਨੇ ਪੇਟੀਐਮ ਪੇਮੈਂਟਸ ਬੈਂਕ ਨੂੰ 29 ਫਰਵਰੀ ਤੋਂ ਬਾਅਦ ਨਵੀਂ ਜਮ੍ਹਾਂ ਰਕਮ ਸਵੀਕਾਰ ਕਰਨ ਅਤੇ ਕ੍ਰੈਡਿਟ ਲੈਣ-ਦੇਣ ਕਰਨ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਇਸ ਕਾਰਨ ਉਪਭੋਗਤਾ ਹੁਣ ਬੈਂਕਿੰਗ ਅਤੇ ਵਾਲਿਟ ਸੇਵਾਵਾਂ ਦੀ ਵਰਤੋਂ ਨਹੀਂ ਕਰ ਸਕਣਗੇ। ਕੇਂਦਰੀ ਬੈਂਕ ਨੇ ਆਪਣੇ ਆਦੇਸ਼ ‘ਚ ਕਿਹਾ ਹੈ ਕਿ 11 ਮਾਰਚ ਤੋਂ ਬਾਅਦ ਕੰਪਨੀ ਨਵੇਂ ਗਾਹਕ ਨਹੀਂ ਜੋੜ ਸਕੇਗੀ। ਇਸ ਆਰਡਰ ਦਾ ਸਿੱਧਾ ਅਸਰ ਲੱਖਾਂ ਯੂਜ਼ਰਸ ‘ਤੇ ਪੈਣ ਵਾਲਾ ਹੈ।
ਉਪਭੋਗਤਾ ਇਨ੍ਹਾਂ ਸੇਵਾਵਾਂ ਦਾ ਨਹੀਂ ਲੈ ਸਕਣਗੇ ਲਾਭ
29 ਫਰਵਰੀ 2024 ਤੋਂ ਬਾਅਦ ਕਿਸੇ ਵੀ ਗਾਹਕ ਖਾਤੇ, ਪ੍ਰੀਪੇਡ ਸਾਧਨ, ਵਾਲਿਟ, ਫਾਸਟੈਗ, NCMC ਕਾਰਡ ਆਦਿ ਵਿੱਚ ਕਿਸੇ ਵੀ ਵਿਆਜ, ਕੈਸ਼ਬੈਕ ਜਾਂ ਰਿਫੰਡ ਤੋਂ ਇਲਾਵਾ ਕੋਈ ਵੀ ਜਮ੍ਹਾਂ, ਕ੍ਰੈਡਿਟ ਟ੍ਰਾਂਜੈਕਸ਼ਨ ਜਾਂ ਟਾਪ ਅੱਪ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ।
RBI ਨੇ ਕੀ ਕਿਹਾ?
ਆਰਬੀਆਈ ਨੇ ਸਪੱਸ਼ਟ ਨਿਰਦੇਸ਼ ਦਿੱਤੇ ਹਨ ਕਿ 29 ਫਰਵਰੀ ਤੋਂ ਬਾਅਦ ਬੈਂਕ ਦੁਆਰਾ ਕੋਈ ਹੋਰ ਬੈਂਕਿੰਗ ਸੇਵਾਵਾਂ, ਜਿਵੇਂ ਕਿ ਫੰਡ ਟ੍ਰਾਂਸਫਰ (ਸੇਵਾਵਾਂ ਜਿਵੇਂ AEPS, IMPS ਆਦਿ), BBPOU ਅਤੇ UPI ਸੇਵਾਵਾਂ ਪ੍ਰਦਾਨ ਨਹੀਂ ਕੀਤੀਆਂ ਜਾਣੀਆਂ ਚਾਹੀਦੀਆਂ ਹਨ। ਕੇਂਦਰੀ ਬੈਂਕ ਨੇ One97 Communications Limited ਅਤੇ Paytm ਪੇਮੈਂਟਸ ਸਰਵਿਸਿਜ਼ ਲਿਮਟਿਡ ਦੇ ਨੋਡਲ ਖਾਤਿਆਂ ਨੂੰ 29 ਫਰਵਰੀ, 2024 ਤੋਂ ਪਹਿਲਾਂ ਕਿਸੇ ਵੀ ਹਾਲਤ ਵਿੱਚ ਜਲਦੀ ਤੋਂ ਜਲਦੀ ਬੰਦ ਕਰਨ ਦਾ ਆਦੇਸ਼ ਦਿੱਤਾ ਹੈ। ਆਰਬੀਆਈ ਨੇ ਪੇਮੈਂਟ ਬੈਂਕ ਨੂੰ 15 ਮਾਰਚ ਤੱਕ ਸਾਰੇ ਪਾਈਪਲਾਈਨ ਟ੍ਰਾਂਜੈਕਸ਼ਨਾਂ ਅਤੇ ਨੋਡਲ ਖਾਤਿਆਂ ਦਾ ਨਿਪਟਾਰਾ ਕਰਨ ਅਤੇ ਉਸ ਤੋਂ ਬਾਅਦ ਕਿਸੇ ਵੀ ਹੋਰ ਲੈਣ-ਦੇਣ ‘ਤੇ ਰੋਕ ਲਗਾਉਣ ਦੇ ਨਿਰਦੇਸ਼ ਦਿੱਤੇ ਹਨ।
ਇਸ ਕਾਰਨ ਆਇਆ ਹੈ ਇਹ ਫੈਸਲਾ
RBI ਨੇ ਕੰਪਨੀ ਦੀ ਆਡਿਟ ਰਿਪੋਰਟ ‘ਚ ਪਾਈਆਂ ਗਈਆਂ ਕਮੀਆਂ ਦੇ ਆਧਾਰ ‘ਤੇ ਪੇਟੀਐਮ ਪੇਮੈਂਟਸ ਬੈਂਕ ਦੀਆਂ ਸੇਵਾਵਾਂ ‘ਤੇ ਪਾਬੰਦੀ ਲਗਾਉਣ ਦਾ ਫੈਸਲਾ ਲਿਆ ਹੈ। ਬੈਂਕ ਦਾ ਕਹਿਣਾ ਹੈ ਕਿ ਕੰਪਨੀ ਵੱਲੋਂ ਪੇਸ਼ ਕੀਤੀ ਗਈ ਜਾਣਕਾਰੀ ਵਿੱਚ ਬੇਨਿਯਮੀਆਂ ਪਾਈਆਂ ਗਈਆਂ ਹਨ। ਬੈਂਕ ਨੇ ਆਪਣੇ ਆਦੇਸ਼ ‘ਚ ਸਪੱਸ਼ਟ ਤੌਰ ‘ਤੇ ਇਹ ਨਹੀਂ ਦੱਸਿਆ ਹੈ ਕਿ ਇਹ ਪਾਬੰਦੀ ਕਦੋਂ ਤੱਕ ਜਾਰੀ ਰਹੇਗੀ। ਇਸ ਤੋਂ ਇਹ ਸਪੱਸ਼ਟ ਹੋ ਜਾਂਦਾ ਹੈ ਕਿ ਪੇਟੀਐਮ ਪੇਮੈਂਟਸ ਬੈਂਕ ਦੇ ਉਪਭੋਗਤਾ ਇੱਕ ਮਹੀਨੇ ਬਾਅਦ ਸੇਵਾ ਦਾ ਲਾਭ ਨਹੀਂ ਲੈ ਸਕਣਗੇ।