ਲੁਧਿਆਣੇ ਦੀ ਇਸ ਸੜਕ ‘ਤੇ ਸਫ਼ਰ ਕਰਨ ਤੋਂ ਪਹਿਲਾ ਜਰੂਰ ਪੜ੍ਹ ਲਿਓ ਇਹ ਖਬਰ ! ਨਹੀਂ ਤਾਂ ਹੋ ਸਕਦਾ ਹੈ ਚਲਾਨ

ਲੁਧਿਆਣਾ ਵਿੱਚ ਜਗਰਾਓਂ ਪੁਲ ਤੋਂ ਜਲੰਧਰ ਬਾਈਪਾਸ ਵੱਲ ਜਾਣ ਵਾਲੇ ਐਲੀਵੇਟਿਡ ਫਲਾਈਓਵਰ ਨੇ ਕਈ ਲੋਕਾਂ ਦੀ ਜਾਨ ਲੈ ਲਈ ਹੈ। ਇਸ ਦੇ ਮੱਦੇਨਜ਼ਰ ਹੁਣ ਟਰੈਫਿਕ ਪੁਲਿਸ ਵੱਲੋਂ ਇਸ ਪੁੱਲ ’ਤੇ ਸਪੀਡ ਰਾਡਾਰ ਮੀਟਰ ਲਗਾ ਦਿੱਤਾ ਗਿਆ ਹੈ। ਇਸ ਪੁੱਲ ‘ਤੇ ਇੱਕ ਸਾਲ ‘ਚ ਕਰੀਬ 4-5 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਹਫਤੇ ‘ਚ ਕਰੀਬ 3 ਤੋਂ 4 ਦਿਨ ਇਸ ਪੁੱਲ ‘ਤੇ ਸਪੀਡ ਰਾਡਾਰ ਮੀਟਰ ਲਗਾਏ ਜਾਣਗੇ, ਤਾਂ ਜੋ ਤੇਜ਼ ਰਫਤਾਰ ਵਾਹਨ ਚਾਲਕਾਂ ਖਿਲਾਫ ਕਾਰਵਾਈ ਕੀਤੀ ਜਾ ਸਕੇ। ਪੁੱਲ ’ਤੇ ਕਾਰ ਚਾਲਕ 40 ਕਿਲੋਮੀਟਰ ਦੀ ਰਫ਼ਤਾਰ ਨਾਲ ਗੱਡੀ ਚਲਾ ਸਕਦੇ ਹਨ ਪਰ ਇੱਥੇ ਡਰਾਈਵਰ ਸਪੀਡ 40 ਤੋਂ ਉਪਰ ਹੀ ਰੱਖਦੇ ਹਨ। ਅਜਿਹੀ ਸਥਿਤੀ ਵਿੱਚ, ਜੇਕਰ ਸਪੀਡ 60 ਤੋਂ ਵੱਧ ਹੈ, ਤਾਂ ਸਪੀਡ ਮੀਟਰ ਤੁਰੰਤ ਇਸ ਨੂੰ ਨੋਟ ਕਰੇਗਾ।

ਇਸ ਪੁੱਲ ‘ਤੇ ਪਿਛਲੇ 2 ਸਾਲਾਂ ‘ਚ ਕਰੀਬ 10 ਤੋਂ 15 ਲੋਕ ਜ਼ਖਮੀ ਹੋ ਚੁੱਕੇ ਹਨ। ਇਸ ਪੁੱਲ ਨੂੰ ਖੂਨੀ ਪੁਲ ਵੀ ਕਿਹਾ ਜਾਂਦਾ ਹੈ ਕਿਉਂਕਿ ਜਦੋਂ ਇਹ ਬਣਾਇਆ ਗਿਆ ਸੀ ਤਾਂ ਇਸ ਦੀਆ ਸਾਈਡਾਂ ਨੂੰ ਕਵਰ ਨਹੀਂ ਕੀਤਾ ਗਿਆ ਸੀ, ਜਿਸ ਕਾਰਨ ਕਰੀਬ 1 ਮਹੀਨੇ ਵਿੱਚ 4 ਤੋਂ 6 ਲੋਕ ਪੁੱਲ ਤੋਂ ਹੇਠਾਂ ਡਿੱਗ ਕੇ ਮਰ ਜਾਂਦੇ ਸਨ। ਹਾਦਸਿਆਂ ਦੀ ਵਧਦੀ ਗਿਣਤੀ ਤੋਂ ਬਾਅਦ ਸਮਾਜਿਕ ਜਥੇਬੰਦੀਆਂ ਨੇ ਪੁੱਲ ਨੂੰ ਲੋਹੇ ਦੀਆਂ ਚਾਦਰਾਂ ਨਾਲ ਕਵਰ ਕਰਵਾਇਆ ਸੀ। ਲੁਧਿਆਣਾ ਸ਼ਹਿਰ 2021 ਵਿੱਚ ਸੜਕ ਹਾਦਸਿਆਂ ਦੇ ਮਾਮਲੇ ਵਿੱਚ ਦੇਸ਼ ਭਰ ਵਿੱਚ 5ਵੇਂ ਨੰਬਰ ‘ਤੇ ਹੈ। ਐਨਸੀਆਰਬੀ (ਨੈਸ਼ਨਲ ਕ੍ਰਾਈਮ ਰਿਕਾਰਡ ਬਿਊਰੋ) ਦੀ ਰਿਪੋਰਟ ਮੁਤਾਬਿਕ ਸ਼ਹਿਰ ਦੀ ਮੌਤ ਦਰ 77.2 ਫੀਸਦੀ ਰਹੀ ਹੈ। ਸਾਲ 2020 ਦੇ ਮੁਕਾਬਲੇ ਲੁਧਿਆਣਾ ਵਿੱਚ ਮੌਤ ਦਰ ਵਿੱਚ 4.72 ਫੀਸਦੀ ਦਾ ਵਾਧਾ ਹੋਇਆ ਹੈ।