ਦੁੱਧ ਪੀਣਾ ਸਿਹਤ ਲਈ ਕਾਫੀ ਜਰੂਰੀ ਹੁੰਦਾ ਹੈ। ਬਹੁਤ ਸਾਰੇ ਲੋਕ ਹਰ ਰੋਜ਼ ਦੁੱਧ ਪੀਂਦੇ ਹਨ। ਦੁੱਧ ਪੀਣ ਨਾਲ ਸਰੀਰ ‘ਚ ਪ੍ਰੋਟੀਨ ਅਤੇ ਕੈਲਸ਼ੀਅਮ ਦੀ ਜਰੂਰਤਾਂ ਵੀ ਪੂਰੀਆਂ ਹੁੰਦੀਆਂ ਹਨ ਅਤੇ ਦੁੱਧ ਹੱਡੀਆਂ ਨੂੰ ਮਜ਼ਬੂਤ ਕਰਨ ਦੇ ਨਾਲ-ਨਾਲ ਵਿਕਾਸ ਵਿੱਚ ਵੀ ਸਹਾਇਤਾ ਕਰਦਾ ਹੈ। ਦੁੱਧ ‘ਚ ਬਹੁਤ ਸਾਰੇ ਪੋਸ਼ਕ ਤੱਤ ਅਤੇ ਪਾਚਕ ਤੱਤ ਹੁੰਦੇ ਹਨ ਜੋ ਪਾਚਕ ਸ਼ਕਤੀ ਨੂੰ ਵਧਾਉਣ ਵਿੱਚ ਸਹਾਇਤਾ ਕਰਦੇ ਹਨ। ਆਮ ਤੌਰ ‘ਤੇ ਲੋਕ ਦੁੱਧ ਨੂੰ ਉਬਾਲ ਕੇ ਪੀਂਦੇ ਹਨ, ਪਰ ਬਹੁਤੇ ਲੋਕ ਅਜਿਹੇ ਵੀ ਹਨ ਜੋ ਕੱਚਾ ਦੁੱਧ ਪੀਣਾ ਪਸੰਦ ਕਰਦੇ ਹਨ। ਲੋਕਾਂ ਵਿੱਚ ਇੱਕ ਵਿਸ਼ਵਾਸ ਇਹ ਵੀ ਹੈ ਕਿ ਕੱਚਾ ਦੁੱਧ ਸਿਹਤ ਲਈ ਬਹੁਤ ਫਾਇਦੇਮੰਦ ਹੁੰਦਾ ਹੈ, ਪਰ ਨਵੀਂ ਖੋਜ ਵਿੱਚ ਇਹ ਪਾਇਆ ਗਿਆ ਹੈ ਕਿ ਕੱਚੇ ਦੁੱਧ ਦਾ ਸੇਵਨ ਸਰੀਰ ਵਿੱਚ ਕਈ ਸਮੱਸਿਆਵਾਂ ਪੈਦਾ ਕਰ ਸਕਦਾ ਹੈ।
ਐੱਫ.ਡੀ.ਏ. ਦੇ ਅਨੁਸਾਰ, ਕਿਸੇ ਵੀ ਜਾਨਵਰ ਦੇ ਦੁੱਧ ਵਿੱਚ ਸਾਲਮੋਨੇਲਾ, ਈ. ਕੋਲੀ, ਲਿਸਟੀਰੀਆ ਵਰਗੇ ਨੁਕਸਾਨਦੇਹ ਬੈਕਟਰੀਆ ਹੁੰਦੇ ਹਨ, ਅਤੇ ਜੇਕਰ ਦੁੱਧ ਨੂੰ ਬਿਨਾਂ ਉਬਾਲੇ ਪੀਤਾ ਜਾਵੇ ਤਾਂ ਇਹ ਫੂਡ ਪਾਇਜਨਿੰਗ ਦਾ ਕਾਰਨ ਬਣ ਸਕਦਾ ਹੈ। ਕੱਚੇ ਦੁੱਧ ‘ਚ ਬਹੁਤ ਸਾਰੇ ਅਜਿਹੇ ਬੈਕਟੀਰੀਆ ਹੁੰਦੇ ਹਨ ਜੋ ਸਾਡੇ ਸਰੀਰ ਵਿੱਚ ਪਹੁੰਚ ਸਕਦੇ ਹਨ ਅਤੇ ਪ੍ਰਤੀਕ੍ਰਿਆਸ਼ੀਲ ਗਠੀਆ ਵਰਗੀਆਂ ਗੰਭੀਰ ਬਿਮਾਰੀਆਂ, ਦਸਤ, ਡੀਹਾਈਡਰੇਸ਼ਨ, ਗੁਇਲਿਨ-ਬੈਰੀ ਸਿੰਡਰੋਮ ਅਤੇ ਹੈਮੋਲਿਟਿਕ ਯੂਰੀਮਿਕ ਸਿੰਡਰੋਮ ਦਾ ਕਾਰਨ ਬਣ ਸਕਦੇ ਹਨ। ਜਦੋਂ ਕੱਚਾ ਦੁੱਧ ਕੱਢਿਆ ਜਾਂਦਾ ਹੈ, ਤਾਂ ਇਹ ਦੁੱਧ ਜਾਨਵਰ ਦੇ ਲੇਵੇ ਜਾਂ ਕਈ ਵਾਰ ਪਸ਼ੂਆਂ ਦੇ ਗੁਦਾ ਦੇ ਸੰਪਰਕ ਵਿੱਚ ਆਉਂਦਾ ਹੈ, ਜਿਸ ਕਾਰਨ ਦੁੱਧ ਦੇ ਦੂਸ਼ਿਤ ਹੋਣ ਦੀ ਸੰਭਾਵਨਾ ਵੱਧ ਜਾਂਦੀ ਹੈ।
ਕੱਚਾ ਦੁੱਧ ਕਮਜ਼ੋਰ ਇਮਊਨਿਟੀ ਵਾਲੇ ਬੱਚਿਆਂ ਅਤੇ ਨੌਜਵਾਨਾਂ ਨੂੰ ਵਧੇਰੇ ਨੁਕਸਾਨ ਪਹੁੰਚਾ ਸਕਦਾ ਹੈ। ਇਸ ਦੇ ਸੇਵਨ ਕਾਰਨ ਮਤਲੀ, ਉਲਟੀਆਂ ਜਾਂ ਦਸਤ ਆਦਿ ਦੀ ਸੰਭਾਵਨਾ ਬਹੁਤ ਜਿਆਦਾ ਵੱਧ ਜਾਂਦੀ ਹੈ। ਕੱਚੇ ਦੁੱਧ ‘ਚ ਅਜਿਹੇ ਬਹੁਤ ਸਾਰੇ ਜੀਵਾਣੂ ਹੁੰਦੇ ਹਨ ਜੋ ਟੀਬੀ ਦੇ ਨਾਲ ਬਹੁਤ ਸਾਰੀਆਂ ਘਾਤਕ ਬਿਮਾਰੀਆਂ ਨੂੰ ਵੀ ਸੱਦਾ ਦੇ ਸਕਦੇ ਹਨ। ਸਰੀਰ ਲਈ ਇਹ ਜ਼ਰੂਰੀ ਹੈ ਕਿ ਐਸਿਡ ਦਾ ਪੱਧਰ ਨਿਯੰਤਰਣ ਵਿੱਚ ਰਹੇ, ਪਰ ਜਦੋਂ ਲੋਕ ਕੱਚਾ ਦੁੱਧ ਪੀਂਦੇ ਹਨ ਤਾਂ ਇਹ ਨਿਯੰਤਰਣ ਵਿੱਚ ਨਹੀਂ ਆਉਂਦਾ ਅਤੇ ਸਰੀਰ ਵਿੱਚ ਐਸਿਡਿਟੀ ਦੀ ਮਾਤਰਾ ਵੱਧ ਜਾਂਦੀ ਹੈ।