ਸਾਬਕਾ ਪ੍ਰਧਾਨ ਮੰਤਰੀ ਡੈਮ ਜੈਸਿੰਡਾ ਆਰਡਰਨ ਆਕਸਫੋਰਡ ਯੂਨੀਵਰਸਿਟੀ ਦੇ ਬਲਾਵਟਨਿਕ ਸਕੂਲ ਆਫ਼ ਗਵਰਨਮੈਂਟ ਵਿੱਚ ਇੱਕ ਡਿਸਟਿੰਗੂਇਸ਼ਡ ਫੈਲੋ ਅਤੇ ਵਿਸ਼ਵ ਨੇਤਾਵਾਂ ਦੇ ਸਰਕਲ ਦੇ ਮੈਂਬਰ ਵੱਜੋਂ ਸ਼ਾਮਿਲ ਹੋ ਗਏ ਹਨ। ਜੈਸਿੰਡਾ ਦਾ ਸਰਕਾਰ ਦੇ ਸਾਬਕਾ ਮੁਖੀਆਂ ਦੇ ਨੈੱਟਵਰਕ ਨਾਲ ਤਿੰਨ ਸਾਲਾਂ ਦੀ affiliation ਹੈ, ਅਤੇ ਉਹ ਅੰਗਰੇਜ਼ੀ ਯੂਨੀਵਰਸਿਟੀ ਵਿੱਚ ਇੱਕ ਸਾਲਾਨਾ ਇਕੱਠ ਵਿੱਚ ਸ਼ਾਮਿਲ ਹੋਣਗੇ। ਵਿਸ਼ਵ ਨੇਤਾਵਾਂ ਦੇ ਸਰਕਲ ਦਾ ਉਦੇਸ਼ ਦੁਨੀਆ ਭਰ ਵਿੱਚ ਸ਼ਾਸਨ ਨੂੰ ਬਿਹਤਰ ਬਣਾਉਣਾ ਹੈ। ਇੱਕ ਬਿਆਨ ਵਿੱਚ, ਪ੍ਰੋਫੈਸਰ ਨਗੇਅਰ ਵੁੱਡਸ ਨੇ ਕਿਹਾ ਕਿ ਉਹ ਡੈਮ ਜੈਸਿੰਡਾ ਦਾ ਸਵਾਗਤ ਕਰਕੇ ਖੁਸ਼ ਹਨ। “ਸੰਕਟ ਦੇ ਸਮੇਂ ਵਿੱਚ ਉਨ੍ਹਾਂ ਦੀ ਅਗਵਾਈ, ਜਨਤਕ ਸੇਵਾ ਪ੍ਰਤੀ ਵਚਨਬੱਧਤਾ, ਅਤੇ ਸ਼ਾਸਨ ਦੀ ਡੂੰਘੀ ਸਮਝ ਸਾਡੇ ਵਿਸ਼ਵ ਭਾਈਚਾਰੇ ਲਈ ਅਨਮੋਲ ਸੂਝ ਲਿਆਏਗੀ।”
ਪ੍ਰੋਫੈਸਰ ਵੁੱਡਸ ਨੇ ਕਿਹਾ ਕਿ ਆਕਸਫੋਰਡ ਪਹਿਲਕਦਮੀ ਇਸ ਸਾਲ 60 ਦੇਸ਼ਾਂ ਦੇ ਚਾਹਵਾਨ ਜਨਤਕ ਨੇਤਾਵਾਂ ਨੂੰ ਸਿਖਲਾਈ ਦੇਣ ਦਾ ਉਦੇਸ਼ ਰੱਖੇਗੀ। ਡੈਮ ਜੈਸਿੰਡਾ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਉਹ ਵਿਸ਼ਵ ਭਾਈਚਾਰੇ ਨੂੰ ਦਰਪੇਸ਼ ਡੂੰਘੀਆਂ ਚੁਣੌਤੀਆਂ ਦੇ ਆਲੇ-ਦੁਆਲੇ ਸੋਚਣ ਵਿੱਚ ਯੋਗਦਾਨ ਪਾਉਣ ਦੀ ਉਮੀਦ ਕਰਦੇ ਹਨ। ਜੈਸਿੰਡਾ ਨੇ ਅੱਗੇ ਕਿਹਾ ਕਿ, “ਕ੍ਰਾਈਸਟਚਰਚ ਕਾਲ ਕਮਿਊਨਿਟੀ ਦੇ ਅੱਤਵਾਦੀ ਅਤੇ ਹਿੰਸਕ ਕੱਟੜਪੰਥੀ ਸਮੱਗਰੀ ਨੂੰ ਔਨਲਾਈਨ ਖਤਮ ਕਰਨ ਦੇ ਕੰਮ ਰਾਹੀਂ ਮੈਂ ਪਹਿਲਾਂ ਬਲਾਵਟਨਿਕ ਸਕੂਲ ਨਾਲ ਕੰਮ ਕੀਤਾ ਹੈ। ਵਿਸ਼ਵ ਨੇਤਾਵਾਂ ਦੇ ਸਰਕਲ ਵਿੱਚ ਸ਼ਾਮਿਲ ਹੋਣਾ ਨਾ ਸਿਰਫ਼ ਇਹਨਾਂ ਸਬੰਧਾਂ ਨੂੰ ਮਜ਼ਬੂਤ ਕਰਨ ਦਾ ਮੌਕਾ ਪ੍ਰਦਾਨ ਕਰੇਗਾ, ਸਗੋਂ ਇਹ ਮੈਨੂੰ ਨੇਤਾਵਾਂ ਦੀ ਇੱਕ ਨਵੀਂ ਪੀੜ੍ਹੀ – 60 ਤੋਂ ਵੱਧ ਵੱਖ-ਵੱਖ ਦੇਸ਼ਾਂ ਦੇ ਵਿਦਿਆਰਥੀਆਂ – ਦੇ ਨਾਲ ਕੰਮ ਕਰਨ ਦਾ ਮੌਕਾ ਦੇਵੇਗਾ ਜੋ ਹਮਦਰਦੀਪੂਰਨ ਲੀਡਰਸ਼ਿਪ ਰਾਹੀਂ ਸ਼ਾਸਨ ਨੂੰ ਵਧਾਉਣ ਵਿੱਚ ਦਿਲਚਸਪੀ ਰੱਖਦੇ ਹਨ।” ਦੱਸ ਦੇਈਏ ਰਾਜਨੀਤੀ ਛੱਡਣ ਤੋਂ ਬਾਅਦ, ਡੈਮ ਜੈਸਿੰਡਾ ਨੇ ਅਮਰੀਕਾ ਵਿੱਚ ਹਾਰਵਰਡ ਯੂਨੀਵਰਸਿਟੀ ਲਈ ਕੰਮ ਕਰਦੇ ਹੋਏ ਸਮਾਂ ਬਿਤਾਇਆ ਹੈ ਅਤੇ ਪ੍ਰਿੰਸ ਵਿਲੀਅਮ ਦੇ ਅਰਥਸ਼ਾਟ ਇਨਾਮ ਦੀ ਟਰੱਸਟੀ ਹਨ।