ਇਨ੍ਹੀਂ ਦਿਨੀਂ ਵਿਆਹਾਂ ਦਾ ਸੀਜ਼ਨ ਚੱਲ ਰਿਹਾ ਹੈ। ਨਿੱਤ ਵਿਆਹ ਹੋ ਰਹੇ ਹਨ। ਪਰ ਕਈ ਵਾਰ ਸਾਧਾਰਨ ਵਿਆਹ ਵੀ ਖਾਸ ਬਣ ਜਾਂਦਾ ਹੈ ਅਤੇ ਸੁਰਖੀਆਂ ‘ਚ ਰਹਿੰਦਾ ਹੈ। ਅਜਿਹਾ ਹੀ ਇੱਕ ਵਿਆਹ ਪੰਜਾਬ ਦੇ ਫ਼ਿਰੋਜ਼ਪੁਰ ਵਿੱਚ ਵੀ ਹੋਇਆ, ਜੋ ਸੁਰਖੀਆਂ ਵਿੱਚ ਆ ਗਿਆ ਹੈ। ਆਮ ਤੌਰ ‘ਤੇ ਵਿਆਹ ਦੀ ਰਸਮ ਦੌਰਾਨ ਲਾੜਾ ਬਰਾਤ ਲੈ ਕੇ ਲਾੜੀ ਦੇ ਘਰ ਜਾਂਦਾ ਹੈ। ਲਾੜੇ ਦੇ ਪਰਿਵਾਰਕ ਮੈਂਬਰ, ਰਿਸ਼ਤੇਦਾਰ ਅਤੇ ਦੋਸਤ ਬਰਾਤ ਵਿੱਚ ਸ਼ਾਮਿਲ ਹੁੰਦੇ ਹਨ। ਪਰ ਪੰਜਾਬ ਦੇ ਫ਼ਿਰੋਜ਼ਪੁਰ ਦੇ ਇੱਕ ਪਿੰਡ ਵਿੱਚ ਇਹ ਪਰੰਪਰਾ ਉਲਟ ਗਈ। ਕਿਉਂਕਿ ਇੱਥੇ ਲਾੜਾ ਨਹੀਂ ਸਗੋਂ ਲਾੜੀ ਬਰਾਤ ਲੈ ਕੇ ਪਹੁੰਚੀ। ਇਸ ਦੌਰਾਨ ਬਰਾਤ ‘ਚ ਬਰਾਤੀ ਵੀ ਨੱਚਦੇ ਹੋਏ ਪਹੁੰਚੇ ।
ਇਹ ਅਨੋਖਾ ਵਿਆਹ ਫ਼ਿਰੋਜ਼ਪੁਰ ਦੇ ਪਿੰਡ ਕਰੀ ਕਲਾਂ ਵਿੱਚ ਹੋਇਆ। ਆਮ ਤੌਰ ‘ਤੇ ਲਾੜਾ ਵਿਆਹ ਦੀ ਬਾਰਾਤ ਲੈ ਕੇ ਲਾੜੀ ਦੇ ਘਰ ਪਹੁੰਚਦਾ ਹੈ ਪਰ ਇੱਥੇ ਲਾੜੀ ਵਿਆਹ ਦੀ ਬਾਰਾਤ ਲੈ ਕੇ ਲਾੜੇ ਦੇ ਘਰ ਪਹੁੰਚੀ। ਇਹ ਨਜ਼ਾਰਾ ਦੇਖ ਲੋਕ ਹੈਰਾਨ ਰਹਿ ਗਏ। ਖਾਸ ਗੱਲ ਇਹ ਹੈ ਕਿ ਲਾੜਾ-ਲਾੜੀ ਦੋਵੇਂ ਵਿਦੇਸ਼ ਰਹਿੰਦੇ ਹਨ ਪਰ ਆਪਣੇ ਪਿੰਡ ਅਤੇ ਦੇਸ਼ ਦੀ ਮਿੱਟੀ ਨਾਲ ਜੁੜੇ ਰਹਿਣ ਲਈ ਉਨ੍ਹਾਂ ਨੇ ਇਸ ਅਨੋਖੇ ਅੰਦਾਜ਼ ‘ਚ ਵਿਆਹ ਕਰਵਾਉਣ ਦਾ ਫੈਸਲਾ ਕੀਤਾ ਹੈ। ਉਨ੍ਹਾਂ ਦੇ ਇਸ ਫੈਸਲੇ ਦੀ ਕਾਫੀ ਤਾਰੀਫ ਵੀ ਹੋ ਰਹੀ ਹੈ।
ਪਿੰਡ ਕਰੀ ਕਲਾਂ ਦੇ ਲੋਕ ਉਸ ਵੇਲੇ ਹੱਕੇ-ਬੱਕੇ ਰਹਿ ਗਏ ਜਦੋਂ ਲਾੜੀ ਹਰਮਨ ਵਿਆਹ ਦੀ ਬਾਰਾਤ ਨਾਲ ਲਾੜੇ ਦੇ ਘਰ ਪੁੱਜੀ। ਇੰਨਾ ਹੀ ਨਹੀਂ ਮੁੰਡੇ ਵਾਲਿਆਂ ਨੇ ਖੇਤ ਵਿੱਚ ਖੜ੍ਹੀ ਕਣਕ ਦੀ ਫ਼ਸਲ ਦੇ ਵਿਚਕਾਰ ਇੱਕ ਵਿਸ਼ਾਲ ਟੈਂਟ ਲਗਾਇਆ ਸੀ। ਖੇਤਾਂ ਵਿੱਚ ਵਿਆਹ ਦੇ ਮਹਿਮਾਨਾਂ ਅਤੇ ਹੋਰ ਰਿਸ਼ਤੇਦਾਰਾਂ ਲਈ ਖਾਣ-ਪੀਣ ਦੇ ਮੇਜ਼ ਵੀ ਲਗਾਏ ਗਏ ਸਨ। ਉਕਤ ਜੋੜਾ ਕੈਨੇਡਾ ‘ਚ ਰਹਿੰਦਾ ਹੈ ਪਰ ਵਿਆਹ ਪੰਜਾਬ ‘ਚ ਕਰਨ ਦਾ ਫੈਸਲਾ ਕੀਤਾ ਹੈ।
ਦੋਵਾਂ ਨੇ ਕਿਹਾ ਕਿ ਪੰਜਾਬ ਦੇ ਕਿਸਾਨ ਆਪਣੀਆਂ ਮੰਗਾਂ ਲਈ ਹਰਿਆਣਾ ਸਰਹੱਦ ‘ਤੇ ਧਰਨੇ ‘ਤੇ ਬੈਠੇ ਹਨ। ਇਸ ਤੋਂ ਪ੍ਰੇਰਿਤ ਹੋ ਕੇ ਅਸੀਂ ਇਸ ਤਰ੍ਹਾਂ ਵਿਆਹ ਕਰਨ ਦਾ ਫੈਸਲਾ ਕੀਤਾ ਹੈ। ਤਾਂ ਜੋ ਅਸੀਂ ਹਮੇਸ਼ਾ ਆਪਣੀ ਧਰਤੀ ਨਾਲ ਜੁੜੇ ਰਹੀਏ। ਬਰਾਤ ‘ਚ ਸ਼ਾਮਿਲ ਹੋਣ ਆਏ ਲੋਕ ਇਹ ਸਭ ਦੇਖ ਕੇ ਹੈਰਾਨ ਰਹਿ ਗਏ। ਸਾਰਿਆਂ ਨੇ ਲਾੜਾ-ਲਾੜੀ ਨੂੰ ਆਸ਼ੀਰਵਾਦ ਦਿੱਤਾ। ਫ਼ਸਲਾਂ ਵਿਚਕਾਰ ਲਾਇਆ ਟੈਂਟ ਬਹੁਤ ਸੋਹਣਾ ਲੱਗ ਰਿਹਾ ਸੀ। ਵਾਢੀ ਦੇ ਵਿਚਕਾਰ ਲੋਕਾਂ ਦੇ ਆਉਣ ਲਈ ਲੰਬੇ ਮੈਟ ਵਿਛਾਏ ਗਏ ਸਨ. ਵਿਆਹ ਦੇ ਪੰਡਾਲ ਨੂੰ ਹਰੇ-ਭਰੇ ਪੌਦਿਆਂ ਨਾਲ ਸਜਾਇਆ ਗਿਆ ਅਤੇ ਵਿਆਹ ਤੋਂ ਬਾਅਦ ਰਿਸ਼ਤੇਦਾਰਾਂ ਨੂੰ ਪੌਦਿਆਂ ਨਾਲ ਵਿਦਾ ਕੀਤਾ ਗਿਆ।