ਵਿਆਹ ਕਰਨਾ ਜਾਂ ਨਾ ਕਰਨਾ ਪੂਰੀ ਤਰ੍ਹਾਂ ਨਿੱਜੀ ਫੈਸਲਾ ਹੈ ਪਰ ਚੀਨ ਦੀ ਇਕ ਕੰਪਨੀ ਨੇ ਆਪਣੇ ਕਰਮਚਾਰੀਆਂ ‘ਤੇ ਵਿਆਹ ਕਰਵਾਉਣ ਲਈ ਦਬਾਅ ਪਾਇਆ ਹੈ। ਕੰਪਨੀ ਨੇ ਅਣਵਿਆਹੇ ਅਤੇ ਤਲਾਕਸ਼ੁਦਾ ਕਰਮਚਾਰੀਆਂ ਨੂੰ ਵਿਆਹ ਨਾ ਕਰਨ ‘ਤੇ ਨੌਕਰੀ ਤੋਂ ਕੱਢਣ ਦੀ ਧਮਕੀ ਦਿੰਦੇ ਹੋਏ ਨੋਟਿਸ ਜਾਰੀ ਕੀਤਾ ਹੈ। ਕੰਪਨੀ ਚਾਹੁੰਦੀ ਸੀ ਕਿ ਸਾਰੇ ਕਰਮਚਾਰੀ ਸਤੰਬਰ ਤੋਂ ਪਹਿਲਾਂ ਵਿਆਹ ਕਰਵਾ ਲੈਣ।
ਦਰਅਸਲ, ਚੀਨ ਦੇ ਸ਼ਾਨਡੋਂਗ ਸੂਬੇ ਦੀ ਸ਼ੈਨਡੋਂਗ ਸ਼ੰਟੀਅਨ ਕੈਮੀਕਲ ਗਰੁੱਪ ਕੰਪਨੀ ਲਿਮਟਿਡ ਨੇ ਆਪਣੇ 1,200 ਤੋਂ ਵੱਧ ਕਰਮਚਾਰੀਆਂ ਨੂੰ ਨੋਟਿਸ ਜਾਰੀ ਕੀਤਾ ਹੈ। ਇਸ ਵਿਚ ਕਿਹਾ ਗਿਆ ਹੈ ਕਿ 28-58 ਸਾਲ ਦੀ ਉਮਰ ਦੇ ਅਣਵਿਆਹੇ ਅਤੇ ਤਲਾਕਸ਼ੁਦਾ ਕਰਮਚਾਰੀਆਂ ਨੂੰ ਸਤੰਬਰ ਦੇ ਅੰਤ ਤੱਕ ਵਿਆਹ ਕਰਵਾ ਲੈਣਾ ਚਾਹੀਦਾ ਹੈ। ਨਿਯਮ ਦੇ ਬਾਰੇ ਵਿੱਚ, ਕੰਪਨੀ ਨੇ ਕਿਹਾ ਕਿ ਇਸ ਕਦਮ ਦਾ ਉਦੇਸ਼ “ਮਿਹਨਤ, ਦਿਆਲਤਾ, ਵਫ਼ਾਦਾਰੀ, ਧਰਮੀ ਪਵਿੱਤਰਤਾ ਅਤੇ ਧਾਰਮਿਕਤਾ” ਦੀ ਭਾਵਨਾ ਅਤੇ ਸੱਭਿਆਚਾਰਕ ਮੁੱਲਾਂ ਨੂੰ ਉਤਸ਼ਾਹਿਤ ਕਰਨਾ ਹੈ।
ਨੋਟਿਸ ਵਿੱਚ ਦਿੱਤੇ ਨਿਯਮ:
ਮਾਰਚ ਦੇ ਅੰਤ ਤੱਕ ਵਿਆਹ ਨਾ ਕਰਵਾਉਣ ਵਾਲਿਆਂ ਨੂੰ ਸਵੈ-ਆਲੋਚਨਾ ਪੱਤਰ ਲਿਖਣਾ ਪਵੇਗਾ।
ਜਿਹੜੇ ਅਣਵਿਆਹੇ ਰਹਿੰਦੇ ਹਨ, ਉਨ੍ਹਾਂ ਦਾ ਮੁਲਾਂਕਣ ਜੂਨ ਦੇ ਅੰਤ ਤੱਕ ਕੀਤਾ ਜਾਵੇਗਾ।
ਜਿਹੜੇ ਲੋਕ ਸਿੰਗਲ ਹਨ, ਉਨ੍ਹਾਂ ਨੂੰ ਸਤੰਬਰ ਦੇ ਅੰਤ ਤੱਕ ਨੌਕਰੀ ਤੋਂ ਕੱਢ ਦਿੱਤਾ ਜਾਵੇਗਾ।
ਹਾਲਾਂਕਿ ਇਸ ਫੈਸਲੇ ਖਿਲਾਫ ਵਿਵਾਦ ਵਧਣ ‘ਤੇ ਸਥਾਨਕ ਮਨੁੱਖੀ ਸਰੋਤ ਅਤੇ ਸਮਾਜਿਕ ਸੁਰੱਖਿਆ ਬਿਊਰੋ ਨੇ ਕੰਪਨੀ ਦੇ ਨੋਟਿਸ ਨੂੰ ਰੱਦ ਕਰ ਦਿੱਤਾ ਅਤੇ ਇਸ ਨੂੰ ਕਿਰਤ ਕਾਨੂੰਨ ਦੀ ਉਲੰਘਣਾ ਕਰਾਰ ਦਿੱਤਾ। ਕੰਪਨੀ ਨੇ ਮੰਨਿਆ ਕਿ ਉਸ ਨੇ ਗਲਤੀ ਕੀਤੀ ਹੈ ਅਤੇ ਇਸ ਨਿਯਮ ਨੂੰ ਤੁਰੰਤ ਰੱਦ ਕਰ ਦਿੱਤਾ ਹੈ। ਕੰਪਨੀ ਦੇ ਪ੍ਰਤੀਨਿਧੀ ਨੇ ਸਪੱਸ਼ਟ ਕੀਤਾ ਕਿ, “ਅਸੀਂ ਸਿਰਫ ਅਣਵਿਆਹੇ ਕਰਮਚਾਰੀਆਂ ਨੂੰ ਵਿਆਹ ਕਰਾਉਣ ਅਤੇ ਪਰਿਵਾਰ ਸ਼ੁਰੂ ਕਰਨ ਲਈ ਪ੍ਰੇਰਿਤ ਕਰਨਾ ਚਾਹੁੰਦੇ ਸੀ।” ਹਾਲਾਂਕਿ ਕੰਪਨੀ ਦੇ ਬੇਇਨਸਾਫ਼ੀ ਅਤੇ ਸਖ਼ਤ ਰਵੱਈਏ ਕਾਰਨ ਇਹ ਨੀਤੀ ਸਖ਼ਤ ਹੁਕਮ ਬਣ ਗਈ, ਜਿਸ ਨੂੰ ਲੋਕਾਂ ਨੇ ਰੱਦ ਕਰ ਦਿੱਤਾ।