ਮੁਹਾਲੀ ਦੀ ਇੱਕ ਰਸੂਖਦਾਰ ਔਰਤ ਨੇ ਸੈਕਟਰ-85 ਸਥਿਤ ਇੱਕ ਬੁਟੀਕ ਵਿੱਚ ਸਿਲਾਈ ਕਰਨ ਲਈ ਸੂਟ ਦਿੱਤਾ ਸੀ। ਪਰ ਬੁਟੀਕ ਸੰਚਾਲਕ ਨੇ ਸੂਟ ਸਿਲਾਈ ਲਈ 50,000 ਰੁਪਏ ਦੀ ਮੰਗ ਕੀਤੀ। ਇਹ ਸੁਣ ਕੇ ਔਰਤ ਦੇ ਪੈਰਾਂ ਹੇਠੋਂ ਜ਼ਮੀਨ ਖਿਸਕ ਗਈ। ਸੱਤਾਧਾਰੀ ਧਿਰ ਤੱਕ ਪਹੁੰਚ ਹੋਣ ਕਾਰਨ ਔਰਤ ਨੇ ਇਸ ਮਾਮਲੇ ਦੀ ਸ਼ਿਕਾਇਤ ਪੰਜਾਬ ਦੇ ਵਿੱਤ ਮੰਤਰੀ ਨੂੰ ਕੀਤੀ। ਇਸ ਤੋਂ ਬਾਅਦ ਕਰ ਵਿਭਾਗ ਦੀ ਟੀਮ ਨੇ ਬੁਟੀਕ ‘ਤੇ ਛਾਪਾ ਮਾਰ ਕੇ ਸੀਲ ਕਰ ਦਿੱਤਾ।
ਦੋਸ਼ ਹੈ ਕਿ ਬੁਟੀਕ ਆਪਰੇਟਰ ਨੇ ਕਰੀਬ 16 ਲੱਖ ਦੀ ਜੀਐਸਟੀ ਚੋਰੀ ਕੀਤੀ ਹੈ। ਹਾਲਾਂਕਿ ਹੁਣ ਤੱਕ ਕਿਸੇ ਅਧਿਕਾਰੀ ਨੇ ਅਧਿਕਾਰਤ ਤੌਰ ‘ਤੇ ਇਸ ਦੀ ਪੁਸ਼ਟੀ ਨਹੀਂ ਕੀਤੀ ਹੈ। ਦੂਜੇ ਪਾਸੇ ਸੂਚਨਾ ਹੈ ਕਿ ਪੰਜਾਬ ਸਰਕਾਰ ਹੁਣ ਆਪਣੇ ਘਰਾਂ ਵਿਚ ਬੁਟੀਕ ਚਲਾਉਣ ਵਾਲਿਆਂ ‘ਤੇ ਸ਼ਿਕੰਜਾ ਕੱਸਣ ਜਾ ਰਹੀ ਹੈ। ਹੁਣ ਇਨ੍ਹਾਂ ਨੂੰ ਟੈਕਸ ਦੇ ਘੇਰੇ ‘ਚ ਲਿਆਉਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ ਕਿਉਂਕਿ ਸਰਕਾਰ ਮਹਿਸੂਸ ਕਰ ਰਹੀ ਹੈ ਕਿ ਬੁਟੀਕ ਦੇ ਨਾਂ ‘ਤੇ ਚੱਲ ਰਹੀਆਂ ਦੁਕਾਨਾਂ ਤੋਂ ਟੈਕਸ ਚੋਰੀ ਹੋ ਰਹੀ ਹੈ। ਘਰਾਂ ਵਿੱਚ ਚੱਲ ਰਹੇ ਬੁਟੀਕ ਸੰਚਾਲਕਾਂ ਨੂੰ ਜੀਐਸਟੀ ਨੰਬਰ ਲੈਣਾ ਪੈ ਸਕਦਾ ਹੈ।
ਦੂਜੇ ਪਾਸੇ ਕੋਈ ਵੀ ਇਸ ਮਾਮਲੇ ਵਿੱਚ ਕੁਝ ਵੀ ਬੋਲਣ ਤੋਂ ਗੁਰੇਜ਼ ਕਰ ਰਿਹਾ ਹੈ ਕਿਉਂਕਿ ਮਾਮਲਾ ਇੱਕ ਰਸੂਖਦਾਰ ਔਰਤ ਨਾਲ ਸਬੰਧਿਤ ਹੈ। ਫਿਲਹਾਲ ਸਰਕਾਰ ਵੀ ਇਸ ਮਾਮਲੇ ਨੂੰ ਦਬਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਇਹ ਵੀ ਨਹੀਂ ਦੱਸਿਆ ਜਾ ਰਿਹਾ ਹੈ ਕਿ ਇੰਨੀ ਮਹਿੰਗੀ ਕੀਮਤ ‘ਤੇ ਸੂਟ ਦੀ ਸਿਲਾਈ ਕਰਵਾਉਣ ਲਈ ਬੁਟੀਕ ਆਪ੍ਰੇਟਰ ਕੋਲ ਕੌਣ ਗਿਆ ਸੀ। ਦੂਜੇ ਪਾਸੇ ਸ਼ਹਿਰ ਵਾਸੀਆਂ ਵਿੱਚ ਸਾਰਾ ਦਿਨ ਚਰਚਾ ਹੁੰਦੀ ਰਹੀ ਕਿ ਹੁਣ ਟੇਲਰਜ਼ ਦੇ ਕੰਮ ਤੋਂ ਲੱਖਾਂ ਦੀ ਆਮਦਨ ਹੁੰਦੀ ਹੈ ਅਤੇ ਸਰਕਾਰ ਨੂੰ ਇਸ ’ਤੇ ਇੱਕ ਰੁਪਏ ਦਾ ਵੀ ਟੈਕਸ ਨਹੀਂ ਦੇਣਾ ਪੈਂਦਾ।