ਭਾਰਤ ਖਿਲਾਫ ਟੈਸਟ ਸੀਰੀਜ਼ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਨਿਊਜ਼ੀਲੈਂਡ ਨੂੰ ਵੱਡਾ ਝਟਕਾ ਲੱਗਿਆ ਹੈ। ਨਿਊਜ਼ੀਲੈਂਡ ਨੂੰ ਇਹ ਝਟਕਾ ਤੇਜ਼ ਗੇਂਦਬਾਜ਼ ਬੇਨ ਸੀਅਰਜ਼ ਦੇ ਸੀਰੀਜ਼ ਤੋਂ ਬਾਹਰ ਹੋਣ ਕਾਰਨ ਲੱਗਾ ਹੈ। ਬੇਨ ਸੀਅਰਸ ਸੱਟ ਕਾਰਨ ਭਾਰਤ ਨਹੀਂ ਆ ਰਹੇ ਹਨ। ਬੇਨ ਦੀ ਕੂਹਣੀ ਵਿੱਚ ਸੱਟ ਲੱਗੀ ਹੈ। 26 ਸਾਲਾ ਗੇਂਦਬਾਜ਼ ਨੂੰ ਇਹ ਸੱਟ ਸ਼੍ਰੀਲੰਕਾ ਦੌਰੇ ‘ਤੇ ਟ੍ਰੇਨਿੰਗ ਦੌਰਾਨ ਲੱਗੀ ਸੀ। ਬੇਨ ਸੀਅਰਜ਼ ਦੀ ਭਾਰਤ ਫੇਰੀ ਦੀ ਯੋਜਨਾ ਸ਼ੁਰੂ ਵਿੱਚ ਉਸ ਦੀ ਖੱਬੀ ਕੂਹਣੀ ਵਿੱਚ ਦਰਦ ਦੀ ਸ਼ਿਕਾਇਤ ਦੇ ਬਾਅਦ ਮੁਲਤਵੀ ਕਰ ਦਿੱਤੀ ਗਈ ਹੈ। ਸਕੈਨ ‘ਚ ਉਸ ਦੀ ਸੱਟ ਦੀ ਗੰਭੀਰਤਾ ਦਾ ਪਤਾ ਲੱਗਣ ਤੋਂ ਬਾਅਦ ਨਿਊਜ਼ੀਲੈਂਡ ਕ੍ਰਿਕਟ ਬੋਰਡ ਨੇ ਡਾਕਟਰੀ ਸਲਾਹ ‘ਤੇ ਬੇਨ ਨੂੰ ਭਾਰਤ ਦੌਰੇ ਤੋਂ ਦੂਰ ਰੱਖਣ ਦਾ ਫੈਸਲਾ ਕੀਤਾ ਹੈ। ਹੁਣ ਜੈਕਬ ਡਫੀ ਭਾਰਤ ਆਉਣਗੇ ਅਤੇ ਬੇਨ ਸੀਅਰਸ ਦੀ ਜਗ੍ਹਾ ਕੀਵੀ ਟੀਮ ਨਾਲ ਜੁੜਨਗੇ।
ਬੇਨ ਸੀਅਰਜ਼ ਨੇ ਇਸ ਸਾਲ ਨਿਊਜ਼ੀਲੈਂਡ ਲਈ ਆਪਣਾ ਟੈਸਟ ਡੈਬਿਊ ਕੀਤਾ ਸੀ। 26 ਸਾਲਾ ਇਸ ਗੇਂਦਬਾਜ਼ ਨੇ ਆਸਟ੍ਰੇਲੀਆ ਖਿਲਾਫ ਹੁਣ ਤੱਕ ਆਪਣਾ ਇਕਲੌਤਾ ਟੈਸਟ ਮੈਚ ਖੇਡਿਆ, ਜਿਸ ‘ਚ ਉਸ ਨੇ 5 ਵਿਕਟਾਂ ਲਈਆਂ ਹਨ। ਮਾਰਚ ‘ਚ ਖੇਡੇ ਗਏ ਇਸ ਟੈਸਟ ਮੈਚ ਤੋਂ ਬਾਅਦ ਬੇਨ ਸੀਅਰਸ ਵੀ ਪਿਛਲੇ ਮਹੀਨੇ ਸ਼੍ਰੀਲੰਕਾ ਦੌਰੇ ‘ਤੇ ਟੀਮ ਨਾਲ ਗਏ ਸਨ ਪਰ ਸੱਟ ਕਾਰਨ ਉਹ ਉੱਥੇ ਨਹੀਂ ਖੇਡ ਸਕੇ ਸਨ।