ਨਿਊਜ਼ੀਲੈਂਡ ‘ਚ ਲੁੱਟ ਖੋਹ ਦੀਆਂ ਵਾਰਦਾਤਾਂ ਦੌਰਾਨ ਹੁੰਦੀਆਂ ਹਿੰਸਕ ਘਟਨਾਵਾਂ ‘ਚ ਲਗਾਤਾਰ ਵਾਧਾ ਹੁੰਦਾ ਜਾ ਰਿਹਾ ਹੈ। ਤਾਜ਼ਾ ਮਾਮਲਾ ਆਕਲੈਂਡ ਤੋਂ ਸਾਹਮਣੇ ਆਇਆ ਹੈ, ਜਿੱਥੇ ਬ੍ਰਿਟਮੋਰਟ ਤੋਂ ਪੇਨਮੋਰ ਜਾ ਰਹੀ ਟਰੇਨ ‘ਚ ਲੁੱਟ ਦੀ ਵਾਰਦਾਤ ਨੂੰ ਅੰਜਾਮ ਦਿੰਦਿਆਂ ਛੋਟੀ ਉਮਰ ਦੇ ਲੁਟੇਰਿਆਂ ਨੇ ਇੱਕ ਯਾਤਰੀ ਦੀ ਖੋਪੜੀ ਦੀ ਹੱਡੀ ਤੋੜ ਦਿੱਤੀ। ਯਾਤਰੀ ਨੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਉਸ ਕੋਲ ਮਹਿੰਗੇ ਆਈਪੋਡ ਦਾ ਜੋੜਾ ਸੀ, ਜਿਸਨੂੰ ਦੇਖਕੇ 12 ਤੋਂ 17 ਸਾਲ ਦੀ ਉਮਰ ਦੇ ਨਸ਼ੇ ਦੀ ਹਾਲਤ ਵਿੱਚ ਮੁੰਡੇ ਕੁੜੀਆਂ ਦੇ ਗਰੁੱਪ ਨੇ ਉਸ ‘ਤੇ ਹਮਲਾ ਕਰ ਦਿੱਤਾ ਤੇ ਇਹ ਹਮਲਾ ਸਿਰਫ ਉਸ ‘ਤੇ ਹੀ ਨਹੀਂ, ਬਲਕਿ 2 ਹੋਰ ਯਾਤਰੀਆਂ ‘ਤੇ ਵੀ ਹੋਇਆ ਤੇ ਉਨ੍ਹਾਂ ਦੇ ਵੀ ਫੋਨ ਤੋੜ ਦਿੱਤੇ ਗਏ। ਪੁਲਿਸ ਅਨੁਸਾਰ ਇਹ 12-13 ਮੁੰਡੇ-ਕੁੜੀਆਂ ਸਨ, ਜਿਨ੍ਹਾਂ ਵਿੱਚੋਂ 9 ਨੂੰ ਫੜ ਲਿਆ ਗਿਆ ਹੈ। ਪਰ ਪਬਲਿਕ ਟ੍ਰਾਂਸਪੋਰਟ ‘ਚ ਹੁੰਦੀਆਂ ਵਾਰਦਾਤਾਂ ਨੇ ਆਮ ਲੋਕਾਂ ‘ਚ ਸਹਿਮ ਦਾ ਮਾਹੌਲ ਪੈਦਾ ਕਰ ਦਿੱਤਾ ਹੈ।
