ਆਲੀਆ ਭੱਟ ਦਾ ਕਰੀਅਰ ਇਸ ਸਮੇਂ ਸਫਲਤਾ ਦੀ ਕਹਾਣੀ ਲਿਖ ਰਿਹਾ ਹੈ। 2022 ਵਿੱਚ, ਆਲੀਆ ਦੀ ਫਿਲਮ ‘ਗੰਗੂਬਾਈ ਕਾਠੀਆਵਾੜੀ’ ਬਾਕਸ ਆਫਿਸ ‘ਤੇ ਸੰਘਰਸ਼ ਕਰ ਰਹੀਆਂ ਹਿੰਦੀ ਫਿਲਮਾਂ ਵਿੱਚੋਂ ਇੱਕ ਬਹੁਤ ਵੱਡੀ ਹਿੱਟ ਰਹੀ ਸੀ। ਇਸ ਦੇ ਨਾਲ ਹੀ ਆਲੀਆ ਦੀ ਓਟੀਟੀ ਰਿਲੀਜ਼ ‘ਡਾਰਲਿੰਗਜ਼’ ਨੂੰ ਵੀ ਕਾਫੀ ਪਸੰਦ ਕੀਤਾ ਗਿਆ ਸੀ ਅਤੇ ਆਲੀਆ ਦੀ ਦੀ ਕਾਫੀ ਤਾਰੀਫ ਵੀ ਹੋਈ ਸੀ। ਇਸ ਦੌਰਾਨ, ਆਲੀਆ ਜਲਦੀ ਹੀ ਆਪਣੇ ਪਤੀ ਰਣਬੀਰ ਕਪੂਰ ਨਾਲ ਪਹਿਲੀ ਵਾਰ ਸਕ੍ਰੀਨ ‘ਤੇ ਨਜ਼ਰ ਆਉਣ ਵਾਲੀ ਹੈ। 9 ਸਤੰਬਰ ਨੂੰ ਸਿਨੇਮਾਘਰਾਂ ‘ਚ ਰਿਲੀਜ਼ ਹੋਣ ਜਾ ਰਹੀ ‘ਬ੍ਰਹਮਾਸਤਰ’ ‘ਚ ਆਲੀਆ-ਰਣਬੀਰ ਦੀ ਜੋੜੀ ਨੂੰ ਦੇਖਣ ਲਈ ਪ੍ਰਸ਼ੰਸਕਾਂ ‘ਚ ਕਾਫੀ ਉਤਸ਼ਾਹ ਹੈ। ਹੁਣ ਆਲੀਆ ਨੇ ਇੱਕ ਅਜਿਹੇ ਮੁੱਦੇ ‘ਤੇ ਖੁੱਲ੍ਹ ਕੇ ਗੱਲ ਕੀਤੀ ਹੈ, ਜੋ ਉਸ ਨੂੰ ਲੰਬੇ ਸਮੇਂ ਤੋਂ ਪਰੇਸ਼ਾਨ ਕਰ ਰਿਹਾ ਹੈ। 2012 ‘ਚ ਕਰਨ ਜੌਹਰ ਦੀ ਫਿਲਮ ਨਾਲ ਡੈਬਿਊ ਕਰਨ ਵਾਲੀ ਆਲੀਆ ਸ਼ਾਇਦ ਸਾਰੇ ਸਟਾਰ ਕਿਡਜ਼ ‘ਚੋਂ ਸਭ ਤੋਂ ਜ਼ਿਆਦਾ ਟ੍ਰੋਲ ਹੋਈ ਹੈ।
ਸੋਸ਼ਲ ਮੀਡੀਆ ‘ਤੇ ਇੰਡਸਟਰੀ ਕਿਡ ਹੋਣ ਦੇ ਨਾਤੇ ਅਤੇ ‘ਭਤੀਜਾਵਾਦ’ ਨਾਲ ਜੁੜੀ ਟ੍ਰੋਲਿੰਗ ਬਾਰੇ ਗੱਲ ਕਰਦੇ ਹੋਏ ਆਲੀਆ ਨੇ ਕਿਹਾ ਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਉਹ ਆਪਣੀਆਂ ਫਿਲਮਾਂ ਰਾਹੀਂ ਅਜਿਹੀਆਂ ਗੱਲਾਂ ਦਾ ਵਧੀਆ ਜਵਾਬ ਦੇ ਸਕਦੀ ਹੈ। ਇਸੇ ਲਈ ਉਸ ਨੇ ਇਸ ਟ੍ਰੋਲਿੰਗ ਦਾ ਜਵਾਬ ਨਹੀਂ ਦਿੱਤਾ ਅਤੇ ਆਪਣੇ ਆਪ ਨੂੰ ਬੁਰਾ ਮਹਿਸੂਸ ਕਰਨ ਤੋਂ ਵੀ ਰੋਕ ਲਿਆ। ਚੈੱਨਲ ਨਾਲ ਗੱਲਬਾਤ ‘ਚ ਆਲੀਆ ਨੇ ਕਿਹਾ, ‘ਬੇਸ਼ੱਕ ਮੈਨੂੰ ਬੁਰਾ ਲੱਗਾ। ਪਰ ਬੁਰਾ ਮਹਿਸੂਸ ਕਰਨਾ ਉਸ ਕੰਮ ਦੀ ਇੱਕ ਛੋਟੀ ਜਿਹੀ ਕੀਮਤ ਹੈ ਜਿਸ ਲਈ ਤੁਹਾਨੂੰ ਪਿਆਰ ਅਤੇ ਸਤਿਕਾਰ ਮਿਲਦਾ ਹੈ। ਮੈਂ ‘ਗੰਗੂਬਾਈ ਕਾਠੀਆਵਾੜੀ’ ਵਰਗੀ ਫ਼ਿਲਮ ਦਿੱਤੀ। ਤਾਂ ਅੰਤ ਵਿੱਚ ਕਿਸ ਨੂੰ ਹੱਸਣ ਦਾ ਮੌਕਾ ਮਿਲਿਆ? ਘੱਟੋ-ਘੱਟ ਜਦੋਂ ਤੱਕ ਮੈਂ ਆਪਣੀ ਫਲਾਪ ਫਿਲਮ ਨਹੀਂ ਦਿੰਦੀ? ਫਿਲਹਾਲ, ਮੈਂ ਹੱਸ ਰਹੀ ਹਾਂ!’
ਆਲੀਆ ਨੇ ਅੱਗੇ ਕਿਹਾ, ‘ਮੈਂ ਇਸ ਦਾ ਜਵਾਬ ਸ਼ਬਦਾਂ ਨਾਲ ਨਹੀਂ ਦੇ ਸਕਦੀ। ਅਤੇ ਜੇ ਤੁਸੀਂ ਮੈਨੂੰ ਪਸੰਦ ਨਹੀਂ ਕਰਦੇ, ਤਾਂ ਮੈਨੂੰ ਨਾ ਦੇਖੋ। ਮੈਂ ਇਸ ਬਾਰੇ ਕੁੱਝ ਨਹੀਂ ਕਰ ਸਕਦੀ।’ ਉਨ੍ਹਾਂ ਅੱਗੇ ਕਿਹਾ ਕਿ ਲੋਕ ਕੁੱਝ ਨਾ ਕੁੱਝ ਕਹਿੰਦੇ ਰਹਿੰਦੇ ਹਨ। ਆਲੀਆ ਨੇ ਉਮੀਦ ਜਤਾਈ ਕਿ ਆਪਣੀਆਂ ਫਿਲਮਾਂ ਰਾਹੀਂ ਉਹ ਲੋਕਾਂ ਨੂੰ ਸਾਬਿਤ ਕਰੇਗੀ ਕਿ ਉਹ ਉਸ ਸਥਾਨ ਦੀ ਪੂਰੀ ਤਰ੍ਹਾਂ ਹੱਕਦਾਰ ਹੈ, ਜਿੱਥੇ ਉਹ ਹੈ।” ਕਰੀਨਾ ਕਪੂਰ ਦੀ ਤਾਜ਼ਾ ਰਿਲੀਜ਼ ਹੋਈ ‘ਲਾਲ ਸਿੰਘ ਚੱਢਾ’ ਦੇ ਸਮੇਂ, ਉਨ੍ਹਾਂ ਦਾ ਇੱਕ ਪੁਰਾਣਾ ਵੀਡੀਓ ਵਾਇਰਲ ਹੋਇਆ ਸੀ, ਜਿਸ ਵਿੱਚ ਉਹ ਟ੍ਰੋਲਸ ਨੂੰ ਜਵਾਬ ਦੇ ਰਹੀ ਸੀ ਕਿ ‘ਸਾਡੀਆਂ ਫਿਲਮਾਂ ਨਾ ਦੇਖੋ, ਕੋਈ ਤੁਹਾਨੂੰ ਮਜਬੂਰ ਨਹੀਂ ਕਰ ਰਿਹਾ’।