18 ਸਤੰਬਰ 2022 ਯਾਨੀ ਕਿ ਐਤਵਾਰ ਦਾ ਦਿਨ ਨਿਊਜੀਲੈਂਡ ਦੇ ਸਿੱਖ ਭਾਈਚਾਰੇ ਲਈ ਇਤਿਹਾਸਕ ਹੋ ਨਿੱਬੜਿਆ, ਦਰਅਸਲ 25 ਗੁਰੂ ਘਰਾਂ, ਸਮਾਜਿਕ ਭਲਾਈ ਦੇ ਖੇਤਰ ਕੰਮ ਕਰਦੀਆਂ ਸੰਸਥਾਵਾਂ ਤੇ ਖੇਡਾਂ ਵਿੱਚ ਗਤੀਸ਼ੀਲ ਕਲੱਬਾਂ ਵੱਲੋਂ ਰਲਕੇ ਸਾਂਝੀ ਨਿਊਜੀਲੈਂਡ ਸੈਂਟਰਲ ਸਿੱਖ ਐਸੋਸੀਏਸ਼ਨ ਦਾ ਗਠਨ ਕੀਤਾ ਗਿਆ ਹੈ। ਆਕਲੈਂਡ ਵਿੱਚ ਜਿੱਥੇ ਸਥਾਨਿਕ ਸੰਸਥਾਵਾਂ ਦੇ ਨੁਮਾਇੰਦੇ ਟਾਕਾਨੀਨੀ ਗੁਰੂ ਘਰ ਇਕੱਠੇ ਹੋਏ, ਉੱਥੇ ਹੀ ਆਕਲੈਂਡ ਤੋਂ ਬਾਹਰੋਂ ਜੂਮ ਦੇ ਮਾਧਿਅਮ ਰਾਹੀਂ ਵੱਖ ਵੱਖ ਸੰਸਥਾਵਾਂ ਦੇ ਨੁਮਾਇੰਦੇ ਸ਼ਾਮਿਲ ਹੋਏ। ਨਿਊਜੀਲੈਂਡ ਸੈਂਟਰਲ ਸਿੱਖ ਐਸੋਸੀਏਸ਼ਨ (ਇਨਕਾਰਪੋਰੇਟਿਡ) ਦਾ ਪਹਿਲਾ ਪ੍ਰਧਾਨ ਸ. ਦਲਜੀਤ ਸਿੰਘ ਨੂੰ ਚੁਣਿਆ ਗਿਆ ਹੈ । ਉੱਥੇ ਹੀ ਬਜੁਰਗ ਆਗੂ ਸ.ਪ੍ਰਿਥੀਪਾਲ ਸਿੰਘ ਬਸਰਾ ਸੰਸਥਾ ਦੇ ਚੇਅਰਮੈਨ ਬਣਾਏ ਗਏ ਹਨ । ਜਰਨਲ ਸੈਕਟਰੀ ਦੀ ਸੇਵਾ ਸ. ਕਰਮਜੀਤ ਸਿੰਘ ਤਲਵਾਰ ਨੂੰ ਦਿੱਤੀ ਗਈ ਹੈ।
ਮੀਤ ਪ੍ਰਧਾਨ ਦੇ ਤੌਰ ਤੇ ਸ. ਗੁਰਿੰਦਰ ਸਿੰਘ ਸ਼ਾਦੀਪੁਰ , ਸਹਾਇਕ ਸਕੱਤਰ ਸ. ਮਲਕੀਤ ਸਿੰਘ ਸਹੋਤਾ, ਖਜਾਨਚੀ ਸ. ਮਨਜੀਤ ਸਿੰਘ ਬਾਠ, ਸਹਾਇਕ ਖਜਾਨਚੀ ਬੀਬੀ ਜਤਿੰਦਰ ਕੌਰ, ਸੰਸਥਾ ਦੇ ਆਡੀਟਰ ਐਡਵੋਕੇਟ ਰਣਬੀਰ ਸਿੰਘ ਸੰਧੂ ਹੋਣਗੇ । ਉੱਥੇ ਹੀ ਸਪੋਕਸਪਰਸਨ ਵਜੋਂ ਸ. ਰਣਬੀਰ ਸਿੰਘ ਲਾਲੀ ਸੇਵਾ ਨਿਭਾਉਣਗੇ। ਇਸੇ ਤਰੀਕੇ ਉਕਤ ਸੰਸਥਾ ਵਿੱਚ ਵੱਖ ਵੱਖ ਵਿੰਗ ਬਣਾਏ ਗਏ ਹਨ । ਜਿਹਨਾਂ ਵਿੱਚ ਧਾਰਮਿਕ ਮਾਮਲਿਆਂ ਦੇ ਚੇਅਰਪਰਸਨ ਹਰਦਿਆਲ ਸਿੰਘ, ਇੰਮੀਗਰੇਸ਼ਨ ਮਾਮਲਿਆਂ ਦੇ ਚੇਅਰਪਰਸਨ ਪਰਮਜੀਤ ਸਿੰਘ ਵੈਲਿੰਗਟਨ, ਇਸਤਰੀ ਵਿੰਗ ਦੇ ਚੇਅਰਪਰਸਨ ਬੀਬੀ ਜੀਤ ਕੌਰ , ਨੌਜਵਾਨ ਮਾਮਲਿਆਂ ਦੇ ਚੇਅਰਪਰਸਨ ਅੰਮ੍ਰਿਤਪਾਲ ਸਿੰਘ ਮਾਨ ਅਤੇ ਸੰਵਿਧਾਨਕ ਮਾਮਲਿਆਂ ਦੇ ਚੇਅਰਪਰਸਨ ਸ. ਅਜੀਤ ਸਿੰਘ ਰੰਧਾਵਾ ਹੋਣਗੇ ।
ਤਕਨੀਕੀ (ਆਈ.ਟੀ) ਕੋਆਰਡੀਨੇਟਰ ਵਜੋਂ ਨਵਤੇਜ ਰੰਧਾਵਾ ਸੇਵਾਵਾਂ ਦੇਣਗੇ । ਉੱਥੇ ਹੀ ਸਾਬਕਾ ਮੈਂਬਰ ਪਾਰਲੀਮੈਂਟ ਡਾ:ਪਰਮਜੀਤ ਪਰਮਾਰ ਪਾਲਿਸੀ ਮੇਕਿੰਗ ਤੇ ਸੰਸਥਾ ਦੇ ਸਲਾਹਕਾਰ ਹੋਣਗੇ । ਦੱਸ ਦੇਈਏ ਇਹ ਉਕਤ ਸਮੁੱਚੀ ਚੋਣ ਸਰਬਸੰਮਤੀ ਨਾਲ ਸਭ ਸੰਸਥਾਵਾਂ ਵੱਲੋਂ ਰਲਕੇ ਕੀਤੀ ਗਈ ਹੈ । ਚੋਣ ਤੋਂ ਉਪਰੰਤ ਸੰਸਥਾ ਦੇ ਫਾਊਂਡਰ ਪ੍ਰਧਾਨ ਬਣਨ ਵਾਲੇ ਸ. ਦਲਜੀਤ ਸਿੰਘ ਨੇ ਕਿਹਾ ਕਿ ਉਕਤ ਸੰਸਥਾ ਦੇ ਮਾਧਿਅਮ ਰਾਹੀਂ ਜਿੱਥੇ ਮੁਲਕ ਭਰ ਤੋਂ ਸਿੱਖ ਭਾਈਚਾਰੇ ਦੀਆਂ ਸਮੱਸਿਆਵਾਂ ਤੇ ਮਸਲਿਆਂ ਤੇ ਨੀਤੀਗਤ ਤਰੀਕੇ ਨਾਲ ਕੰਮ ਕੀਤਾ ਜਾਵੇਗਾ ਉੱਥੇ ਹੀ ਸੰਸਥਾ ਨਾਲ ਜੁੜੇ 25 ਗੁਰੂ ਘਰਾਂ ਦੇ ਇਸ ਮੌਕੇ 5000 ਵਿੱਤੀ ਮੈਂਬਰ ਵੀ ਉਕਤ ਸੰਸਥਾ ਦਾ ਅਸਿੱਧੇ ਰੂਪ ਵਿੱਚ ਹਿੱਸਾ ਹੋਣਗੇ, ਕਿਉਕਿ ਉਹਨਾਂ ਦੇ ਡੈਲੀਗੇਟ ਹੀ ਅੱਗੇ ਕਾਰਜਕਾਰਨੀ ਦਾ ਨਿਰਮਾਣ ਕਰਦੇ ਹਨ । ਉੱਥੇ ਹੀ ਬਹੁਤ ਵਿੰਗਾਂ ਦੇ ਚੇਅਰਪਰਸਨ ਅਤੇ ਹੋਰ ਨਿਯੁਕਤੀਆਂ ਵੀ ਜਲਦ ਹੀ ਸੰਸਥਾ ਵੱਲੋਂ ਕੀਤੀਆਂ ਜਾਣਗੀਆਂ। ਇੱਥੇ ਜ਼ਿਕਰਯੋਗ ਹੈ ਕਿ ਸੰਸਥਾ ਦੇ ਸਾਰੇ ਚੁਣੇ ਮੁਢਲੇ ਮੈਂਬਰਾਂ ਦੀ ਚੋਣ ਉਨ੍ਹਾਂ ਦੀ ਪਿਛਲੇ ਦੋ ਸਾਲ ਦੀ ਕਾਰਗੁਜਾਰੀ ਨੂੰ ਦੇਖ ਕਿ ਕੀਤੀ ਗਈ ਹੈ ।
ਇੱਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਨਿਊਜੀਲੈਂਡ ਦੀ ਅਗਲੀ ਜਣਗਣਨਾ ਤੱਕ ਸਿੱਖ ਭਾਈਚਾਰਾ ਇੱਕ ਲੱਖ ਦੀ ਗਿਣਤੀ ਤੋਂ ਪਾਰ ਹੋ ਕਿ ਮੁਲਕ ਦੀ 2% ਅਬਾਦੀ ਬਣ ਜਾਵੇਗਾ । ਅਜਿਹੇ ਸਮੇਂ ‘ਚ ਅਜਿਹੀ ਸੈਂਟਰਲ ਤੇ ਲੋਕਤੰਤਰਿਕ ਕੌਮੀ ਸੰਸਥਾ ਦੀ ਸਥਾਨਿਕ ਭਾਈਚਾਰੇ ਨੂੰ ਲੰਬੇ ਸਮੇਂ ਤੋਂ ਜਰੂਰਤ ਸੀ । ਜੋ ਹੁਣ ਨਿਊਜੀਲੈਂਡ ਸੈਂਟਰਲ ਸਿੱਖ ਐਸੋਸੀਏਸ਼ਨ ਦੇ ਮਾਧਿਅਮ ਰਾਹੀਂ ਪੂਰੇ ਸਿੱਖ ਭਾਈਚਾਰੇ ਲਈ ਸਰਬ ਸਾਂਝਾ ਮੰਚ ਸਾਬਿਤ ਹੋਵੇਗੀ। ਨਿਊਜੀਲੈਡ ਦੇ ਸਿੱਖਾਂ ਨੇ ਗੋਲਕਾਂ ਤੇ ਪ੍ਰਧਾਨਗੀਆਂ ਪਿੱਛੇ ਹੁੰਦੀਆਂ ਲੜਾਈਆਂ ਨੂੰ ਝੁਠਲਾਉਦੇ ਹੋਏ ਇੱਕ ਨਵੀ ਮਿਸਾਲ ਪੇਸ਼ ਕੀਤੀ ਹੈ ਹੋ ਸੋਚਣ ਨੂੰ ਅਸੰਭਵ ਹੀ ਨਹੀ ਇੱਕ ਸੁਪਨਾ ਲੱਗਦੀ ਸੀ । ਇਹ ਸੰਸਥਾ ਪੂਰੇ ਜੋਰ ਸ਼ੋਰ ਨਾਲ ਕਮਿਊਨਟੀ ਦੇ ਮਸਲਿਆਂ ਤੇ ਵਕਾਲਤ ਕਰੇਗੀ ।