ਨਿਊਜ਼ੀਲੈਂਡ ਸਿਹਤ ਮੰਤਰਾਲੇ ਵੱਲੋਂ ਜਾਰੀ ਕੀਤੇ ਗਏ ਅੰਕੜਿਆਂ ਦੇ ਅਨੁਸਾਰ ਬੁੱਧਵਾਰ ਨੂੰ ਕਮਿਊਨਿਟੀ ਵਿੱਚ 100 ਨਵੇਂ ਕੋਵਿਡ -19 ਕੇਸ ਦਰਜ ਕੀਤੇ ਗਏ ਹਨ। ਆਕਲੈਂਡ ਵਿੱਚ 97 ਅਤੇ ਵਾਈਕਾਟੋ ਵਿੱਚ ਤਿੰਨ ਮਾਮਲੇ ਸਾਹਮਣੇ ਆਏ ਹਨ। ਸਿਹਤ ਦੇ ਡਾਇਰੈਕਟਰ-ਜਨਰਲ ਡਾਕਟਰ ਐਸ਼ਲੇ ਬਲੂਮਫੀਲਡ ਨੇ ਇੰਨ੍ਹਾਂ ਮਾਮਲਿਆਂ ਦੀ ਪੁਸ਼ਟੀ ਕੀਤੀ ਹੈ। ਬਲੂਮਫੀਲਡ ਨੇ ਵੇਲਿੰਗਟਨ ਵਿੱਚ ਕੋਵਿਡ -19 ਰਿਸਪਾਂਸ ਮੰਤਰੀ ਕ੍ਰਿਸ ਹਿਪਕਿਨਸ ਦੇ ਨਾਲ ਦੁਪਹਿਰ 1 ਵਜੇ ਬ੍ਰੀਫਿੰਗ ਵਿੱਚ ਅਪਡੇਟ ਅੰਕੜੇ ਸਾਂਝੇ ਕੀਤੇ ਹਨ। ਇਸ ਡੈਲਟਾ ਪ੍ਰਕੋਪ ਦੇ ਕੁੱਲ ਕੇਸਾਂ ਦੀ ਗਿਣਤੀ ਹੁਣ 3,733 ਹੋ ਗਈ ਹੈ ਜਿਨ੍ਹਾਂ ਵਿੱਚੋਂ 1714 ਠੀਕ ਹੋ ਚੁੱਕੇ ਹਨ।
ਇਹ ਮਾਮਲੇ ਵਾਈਕਾਟੋ ਦੇ ਕੁਝ ਹਿੱਸੇ ਅਲਰਟ ਲੈਵਲ 3 ਦੇ ਦੂਜੇ ਪੜਾਅ ‘ਤੇ ਸ਼ਿਫਟ ਕੀਤੇ ਜਾਣ ਤੋਂ ਬਾਅਦ ਆਏ ਹਨ ਉਸੇ ਸਮੇਂ ਉੱਤਰੀ ਨਾਰਥਲੈਂਡ ‘ਚ ਬੁੱਧਵਾਰ ਸਵੇਰੇ ਅਲਰਟ ਲੈਵਲ 3 ਲਾਗੂ ਹੋਇਆ ਸੀ। 100 ਨਵੇਂ ਕੇਸਾਂ ਵਿੱਚੋਂ 48 ਕੇਸਾਂ ਨੂੰ ਮੌਜੂਦਾ ਕੇਸ ਨਾਲ ਜੋੜਿਆ ਜਾਣਾ ਬਾਕੀ ਹੈ। ਬਲੂਮਫੀਲਡ ਨੇ ਕਿਹਾ ਕਿ ਨੌਰਥਲੈਂਡ ਜਾਂ ਕ੍ਰਾਈਸਟਚਰਚ ਵਿੱਚ ਕੋਈ ਨਵਾਂ ਕੇਸ ਨਾ ਦੇਖਣਾ ਸਕਾਰਾਤਮਕ ਸੀ। ਹਸਪਤਾਲਾਂ ਵਿੱਚ ਇਸ ਵੇਲੇ 58 ਮਰੀਜ਼ ਹਨ; ਮਿਡਲਮੋਰ ਹਸਪਤਾਲ ਵਿੱਚ 15, ਆਕਲੈਂਡ ਹਸਪਤਾਲ ਵਿੱਚ 26 ਅਤੇ ਵੇਟਮਾਟਾ ਹਸਪਤਾਲ ਵਿੱਚ 16। ਵਾਈਕਾਟੋ ਹਸਪਤਾਲ ਵਿੱਚ ਵੀ ਇੱਕ ਮਾਮਲਾ ਹੈ। ਇਨ੍ਹਾਂ ਵਿੱਚੋਂ ਤਿੰਨ ਕੇਸ ICU ਜਾਂ HDU ਵਿੱਚ ਹਨ।